Psa 77 | NdeIBE | STEP | Kumqondisi wokuhlabela. KuJeduthuni, Elika-Asafi. Ihubo. Ngakhala kuNkulunkulu ngicela uncedo; ngakhala kuNkulunkulu ukuthi angizwe.

Psalms 77

1 Ngakhala kuNkulunkulu ngicela uncedo; ngakhala kuNkulunkulu ukuthi angizwe.

2 Ngathi ngikhathazekile ngamdinga uJehova; ebusuku ngazelula izandla azazezadinwa lomphefumulo wami wala ukududuzeka.

3 Ngakukhumbula, O Nkulunkulu, ngabubula; ngacabanga, umoya wami wancipha.

4 Wala ukuthi amehlo ami avaleke; ngangikhathazekile ngisehluleka ukukhuluma.

5 Ngakhumbula ngezinsuku ezedlulayo, izinsuku zakudala;

6 ngakhumbula izingoma zami ebusuku. Inhliziyo yami yacabanga lomoya wami wadinga:

7 “UNkulunkulu uzakhalala kokuphela na? Akasayikuphinde atshengise uthando lwakhe njalo na?

8 Kanti uthando lwakhe olungaphuthiyo selunyamalele kokuphela na? Kanti isithembiso sakhe sesiphelile lanini na?

9 Kanti uNkulunkulu usekhohliwe ukuba lesihawu na? Usethe ngokuzonda wagodla uzwelo lwakhe na?

10 Ngasengikhumbula ngathi, “Yilokhu okunginqundayo, ukuthi isandla sokunene soPhezulu kasisekho phezu kwami.

11 Ngizayikhumbula imisebenzi kaJehova; yebo, ngizayikhumbula imimangaliso yakho yekadeni.

12 Ngizacabanga ngayo yonke imisebenzi yakho nginakane ngazo zonke izenzo zakho ezinkulu.

13 Izindlela zakho, O Nkulunkulu, zingcwele; nguwuphi unkulunkulu omkhulu njengoNkulunkulu wethu na?

14 Nguwe Nkulunkulu owenza izimanga; uyawatshengisa amandla akho ebantwini.

15 Ngengalo yakho elamandla wabakhulula abantu bakho, izizukulwane zikaJakhobe loJosefa.

16 Amanzi akubona wena, O Nkulunkulu, amanzi akubona atshotshobala; izinziki zagonyuluka.

17 Amayezi awathulula amanzi, isibhakabhaka sandindiza ngokuduma; imitshoko yakho yaphazima yaya le lale.

18 Umdumo wakho wezwakala uphakathi kwesivunguzane, umbane wakho wawukhanyisa umhlaba; umhlaba wavevezela wanyikinyeka.

19 Indlela yakho yadabula olwandle, umkhondo wakho phakathi kwamanzi, kodwa izinyathelo zakho zazingabonakali.

20 Wabahola abantu bakho njengomhlambi wezimvu ngesandla sikaMosi lo-Aroni.